LIBRO-CARA. ACTIVIDADE POLO 23 DE ABRIL, DÍA DO LIBRO.

 

Este ano, polo día do libro preparemos desde a biblioteca unha serie de actividades. Unha delas foi un bookface, como vemos no cartel que repartimos polas aulas:

A participación non foi moita, porque estamos xa no terceiro trimestre e as forzas xa van esmorecendo, pero quedounos bastante ben. Esta é a pequena exposición que puxemos na nosa biblioteca:

CONCURSO POLO DÍA DO LIBRO: BÚSCASE

No mes de abril iniciamos un concurso que durará ata maio. Cada día imos poñendo textos na entrada do centro, hai que buscarlles autor e obra. Haberá recompensa!

BASES DO CONCURSO

1.  Poderá participar no concurso todo o alumnado do Centro que así o desexar.

2.  Recollerá o impreso de participación no mostrador da biblioteca ou pedirallo ao profesor/a de Lingua Castelá ou Lingua Galega.

3.  Trátase de averiguar a que autor/-a e obra pertence cada texto. (Non vale o título do relato ou poesía, ten que ser o título do LIBRO: poemario ou colección de relatos)

4.  Cada participante presentará un único impreso cos resultados.

5.  Entregaranse os resultados na biblioteca á hora do recreo ou ao profesorado de Lingua Galega e Lingua Castelá.

6.  Outorgarase o premio a aquel/-a que logre identificar correctamente os sesenta textos ou, se ninguén acada a totalicade, quen se aproxime máis.

7.  En caso de empatar varios no número un, haberá outros dez textos de desempate entre estes/-as participantes.

8.  Establécense os seguintes premios:

1º Dúas entradas para o teatro.

2º Dúas entradas para o cinema.

3º Un libro

9. En caso de acertar menos de trinta, o premio declararase deserto.

10.A participación no concurso supón a aceptación destas bases.

Un exemplo de como quedaron os textos na entrada do Centro:

E por fin os resultados:

GAÑADORES:

1º PREMIO: 51 PUNTOS

Lucas Díaz Viñas

2º PREMIO: 46 PUNTOS

Uxía Fernández Vázquez

3º PREMIO: 44 PUNTOS

Yago Campos Miguel

FALADOIROS LITERARIOS DO CONCELLO DE OURENSE

O martes 28 de abril celebrouse o faladoiro de castelán organizado polo Concello e a Deputación, como todos os anos, foi no Liceo.

 

Esta vez o libro elixido foi Mil cosas de Juan Tallón.

Ás  16.30 comezamos o faladoiro no que coincidimos con outros centros como IES de Maceda, IES Julio Prieto Nespereira, IES O Couto, IES as Lagoas, IES Universidade Laboral e IES Ferro Couselo. O libro propiciou o debate. Comentaron que o vían un libro máis para os seus pais e os seus profesores, pola temática e os problemas que tiñan os protagonistas, que estaban máis acordes con esa franxa de idade. Falouse dos problemas laborais e os traballos alienantes, a sociedade na que vivimos inmersos, que parece que nunca podemos pararnos e estar simplemente sen facer nada, o acoso laboral, o traballo mal remunerado e pouco recoñecido...

Tamén falamos das técnicas narrativas, as oracións curtas, os capítulos tamén curtos e en contrapunto paralelístico dos dous protagonistas, a falta de títulos ou mesmo númeración de capítulos... todo o que conducía a que como lectores foramos pasando páxinas tamén cun ritmo frenético e experimentando as mesmas sensacións ca os protagonistas.

Por último, o que máis debate suscitou foi o impactante final. A algúns parecíalle predecible, pero á maioría conseguiu levarnos por onde quixo e facernos pensar en mil cousas e mil posibilidades, e igual que lles sucedeu aos protagonistas, acabamos esquecéndonos do importante.

Ese mesmo día ás 18:00 tivemos un encontro co autor, Juan Tallón. Foi moi breve na súa exposición e a continuación pasamos ás preguntas. Aproveitamos para preguntarlle polo final, ao que el contestou que partira de aí a raíz dunha reflexión que suscitara nel unha noticia xornalística.

Logo falounos de todo un pouco, da técnica narrativa para dar un ritmo vertixinosos, das personaxes, dunha anécdota persoal sobre unha reportaxe que lle pagaron miserablemente e que deu lugar a un personaxe secundario... e da moitas cousas máis.

Ao final asinounos o libro e vimos que é unha persoa moi afable, que lle presta atención e lle dicica tempo aso seus lectores, facéndolles preguntas a cada un segundo nos iamos achegando.

O autor gustounos aínda moito máis có libro.

XVIII XORNADA DE CLUBS DE LECTURA

O día 29 de abril celebrouse a XVIII Xornada de Clubs de Lectura no Pazo de Congresos de Santiago de Compostale, ao que asistiu a nosa compañeira Patricia.

O programa era o seguinte: 

Nesta xornada compartimos estratexias e experiencias de diferentes centros de ensino, bibliotecas municipais ou concellerías da mocidade. Clubs interxeracionais centrados en álbums ilustrados, clubs interlingüísticos con roles e círculos lectores  ou recursos relacionados coa diversidade e a inclusión (Queeruña, lectura fácil, Mandareiche...) foron algúns exemplos compartidos nesta xornada.

DÍA DA NARRACIÓN ORAL

O xoves 26 de marzo celebramos no CPI José García García de Mende o Día da Narración Oral. É unha actividade destinada a todo o alumnado do Centro, polo que tivemos que agardar a que xa rematasen os exames da ESO, para que todos puidésemos gozar da xornada sen presións.

É esta a segunda edición xa e, igual que o ano pasado, houbo moita participación e moi variada. Repartimos o alumnado en catro espazos, posto que ao non contar con salón de actos, non nos caben todos en ningún lugar interior, e fixemos un itinerario co seguinte programa:

Como vemos, a maioría das actuacións foron do noso propio alumnado, que preparou historias en varios formatos para contar ou representar diante dos seus compañeiros. 

Todos tiveron moito mérito, non só polo ben que saíu a actividade, senón tamén pola aprendizaxe en lingua oral e o valor que supón narrar diante dun público de idades tan diversas (desde os tres anos aos quince) vencendo a vergoña e o medo escénico.

O público de Infantil e primaria agardando o primeiro conto:

Os nenos e nenas de Infantil coa profe Silvia interpretando "As vodas da pulga e o piollo":

Lucas Ojea e a súa nai contando "A pedra de facer sopa":

Manuel Fontemoura fixo unha actuación desinteresada de contos da súa propia creación:

Camilo, Xurxo e Rubén interpretan "Xan de Branco":

Clara, María, Irati, Luca, Alexis e Raúl recrean "A orquestra improvisada":

Eva, Xeila e Andrea lévannos ao mundo máxico das lendas de mouras con "Sabeliña de Resco":

Nerea, Sareth, Alba e Candela contan "As perdices do convite" e afían coitelos, será para cortar orellas?:

O alumnado de primeiro da ESO xunto coa súa profe Patricia sorprendeunos cun teatriño de sombras no que representaron dúas obras da súa creación: "Confía en min" e "Salvemos o oso"

Esteban, Farruco e Brian contan "O dragón de tres cabezas de Cardona":

E remata a sesión con Cibrán, Iago, Antón e Rodrigo contando "Arrocho fóra do saco":

Este úlimo é un conto inédito que lle contou a avoa a Antón para que el e os seus compañeiros o compartisen con todos nós. Grazas desde aquí pola súa colaboración.

E así remata a nosa homenaxe a literatura de tradición oral.

MOITAS GRAZAS A TODAS AS PERSOAS QUE PARTICIPARON E AXUDARON!

ENCONTROS PLAMBE

 O xoves 5 de marzo tivemos as xuntanzas PLAMBE en Santiago de Compostela.

Foron xornadas interesantes, sobre todo a exposición de actuacións na biblioteca por parte de outros centros, que nos dan ideas para seguir co noso labor. 

Comezamos cunha conferencia sobre a lectura na era da IA na que un experto nos falou do que significaba para a lingua escrita e para o cerebro a utilización desta tecnoloxía. Non sei se nos deixou máis tranquilos ou máis preocupados.

Este ano o que máis chamou a atención foi "Lectura fácil e facilitada", que dá resposta á cada vez maior diversidade que temos nas aulas e que, os que non somos especialistas en PT, non estamos preparados para afrontar.

FALADOIROS LITERARIOS DO LICEO

O mércores 5 de marzo acudimos ao faladoiro de galego, que se celebra todos os anos no Liceo, organizado polo Concello e Deputación de Ourense.

Este ano o libro elixido foi Runrum, de Ana Varela.

Na biblioteca do centro tivemos unha xuntanza previa, o martes 3, para preparar o faladoiro, así o noso alumnado sentirase máis seguro e animarase a participar máis.

Foi un libro fácil de ler, pero que non gustou demasiado. Aínda así o debate foi interesante e falamos de moitos temas como: as enfermidades mentais, os prezuízos, as relacións tóxicas, o suicidio...

Ao final da tarde tivemos un encontra coa autora, mágoa que a maioría do alumnado non puido quedarse, porque tiñan outras actividades extraescolares.